РафтингымкIэ Урысыемрэ Къыблэ шъолъырымрэ ячемпионатэу «Интерралли Шъхьагуащ – 2011»-рэ зыфиIорэр Адыгэ Республикэм щыкIуагъ. Ащ изэфахьысыжьхэмкIэ Адыгеим ихъулъфыгъэ спортсмен купым ящэнэрэ чIыпIэр ыубытыгъ, бзылъфыгъэхэр яплIэнэрэу хъугъэх. Спортсмен хъулъфыгъэ купхэм ащыщэу къалэу Красноярскэ къыикIыгъэм апэрэ чIыпэр къыдихыгъ. Бзылъфыгъэ купмэ азыфагу анахь лъэшэу къычIэкIыгъэхэр къалэу Красноярскэ къыкIыгъэхэр ары.

ХыIушъом щыпсэурэ шапсыгъэмэ я «Адыгэ Хасэ» ия VII-рэ зэфэс мэлылъфэгъум и 30-м Шъачэ щыкIуагъ. Краснодар краим иадминистрацие иIофышIэхэр, Абхъаз, Адыгэ, Къэрэщэе-Щэрджэс, Къэбэртэе-Бэлкъар республикэхэм къарыкIыгъэ лIыкIохэр ащ хэлэжьагъэх. КъызэриIуагъэмкIэ, мы мафэхэм яхъулIэу хыIушъом щыпсэурэ кIэлэеджакIомэ азыныкъом тIэкIу нахьыб рыгущыIэрэр, зэзгъашIэрэр ащ нахь макI, процент 20 ныIэп.

Министрэхэм якабинет иунашъокIэ ИнформатизациемкIэ АР-м игъэIорышIапIэ ипащэ игуадзэу Васильев Александр агъэнэфагъ. Мы унашъор Адыгэ республикэм и Министрэхэм якабинтет фэгъахьыгъэ хэбзэгъэуцугъэм ия 13 статья, ия 3 Iахь тегъэпсыхьагъ. Республикэм икъэбарIопщхэм къызэратырэмкIэ, Министрэхэм якабинет зиштэгъэ мафэм щегъэжьагъэу а унашъом кIуачIэ иIэ хъугъэ. ИнформатизациемкIэ АР-м игъэIорышIапIэ къыззэIуахыгъэр бэшIагъэп.

РафтингымкIэ зэнэкъокъухэу «Интерралли-Шъхьэгуащ» зыфиIохэрэр мэлылъфэгъум и 27-м Мыекъопэ районым щырагъэжьагъэх. Ащ къыдхэлъытагъэх Урысые Федерацием, ЮФО-м ыкIи республикэм ячемпионатхэр. Зэнэкъокъухэм ахэлэжьэщтхэр Гъозэрыплъэ щызэрэугъоигъэх, пэшIорэгъэшI ушетынхэр псыхъоу Шъхьэгуащэ щакIу. Тызэрэщагъэгъозагъэу, непэ рафтигымкIэ Адыгэ Республикэм ичемпионат къызэIуахыщт.

Олимпиадэм ыпэкIэ шапсыгъэмэ язэфэсэу Шъачэ щырекIокIыщтыр зэпстэу адыгэмэ язэфэсэу къикIын ылъэкIыщт. Ащ тетэу елъытэ «Адыгэ Хэсэ» (Тэхътэмыкъуай) тхьэматэу ШъэопцIэкъо Ильясэ. «Джыдэдэм зэфэсым зышI-зымышIи – бэ тегущыIэрэр. Ар зэпхыгъэр, непэ шапсыгъэхэр «черкес IофымкIэ» гупчэм итэу мэхъух», - иеплъыкIэ къыреIотыкIы ШъэопцIэкъом. Непэ шапсыгъэмэ япшъэрылъ хъурэр, - еIо ащ, - зэпстэу адыгэмэ ягухэлъхэм тетэу псэунхэу ары.

Къашъом и Дунэе мафэ фэгъэхьыгъэ концертэу мэлылъфэгъум и 27-м Мыекъуапэ щыкIощтым Адыгэ Республикэм и Къэралыгъо Академическэ къэшъокIо ансамблэу «Налмэсыр», Темыр Осетием-Аланием и Къэралыгъо ансамблэу «Аланыр» хэлэжьэщтых. «Налмэсым» ипащэу Къулэ Мухьамэд къызэриIоу, къашъом и Дунэе мафэ фэгъэхьыгъэ концертыр гъэшIэгъоны хъущт. Пчыхьэзэхахьэм адыгэхэр, урысхэр, дагъыстанхэр, нэмыкI лъэпкъхэу тиреспубликэ исхэр еплъыщтых.

Адыгэ Ныпэм имэфэкI мэлылъфэгъум и 25-м гужъогъэ гъэтхэ шъонтIэгъакIэрэ кIэрэкIагъэрэ Мыекъуапэ къыдихьагъ. МэфэкIым изэкIэлъыкIон зэрэщырахъухьэгъагъэу, машинэхэр – быракъ зытIущхэр къарыщэу – зэкIэлъыкIoхэу тыгъэкъохьапIэмрэ къокIыпIэмрэ алъэныкъокIэ Адыгеим икъэлэ шъхьаIэ урамэу Хьахъуратэ ыцIэ зыхьырэм тетыхэу къыдэхьагъэх. Темыр лъэныкъом къикIыхэу – вокзалыр ары – къалэм игупчэ шыухэр ежьагъэх.

Полицием фэгъахьыгъэ къэралыгъо хэбзэгъэуцугъэм гъэтхэпэмазэм иапэрэ мафэ щегъэжьагъэу кIуачIэ иIоу хъугъэ. Мы мафэхэм а къулыкъум иIофышIэхэм зимычэзыу аттестацие акIунэу загъэхьазыры. ХэгъэгукIоцI IофхэмкIэ министерствэу Адыгеим щыIэм ипащэ игуадзэу Ермилов Александрэ ащ фэгъахьыгъэу гъэтхэгум и 22-м пресс-конференцие къытыгъ. КъызэриIотагъэмкIэ, аттестациер гъэмафэм иапэрэ мазэ нэс кIощт. Ар гъогогъуищэу зэтефыгъ.

Мыекъуапэ, Адыгэ лъэпкъ музеим псэушъхьэ зэфэшъхьафхэм якъэгъэлъэгъонхэр тыгъуасэ (гъэтхэгу мазэм и 20-м) къыщызэIуахыгъ. Республикэм ичIыопс ис псэушъхьэмэ яплъы зышIоигъохэр ащ рагъэблагъэх. Ащ икъэбар къэзыIотагъэр Адыгеим ирадиу. Тимузей, - къыщиIуагъ ащ музеим иIофышIэу Тэу Аслъан, - къэгъэлъэгъон гъэшIэгъон дэдэхэр зэхещэх. Ахэр зыфэгъахьыгъэр ти адыгэ чIыопс, ти адыгэ чIыналъ.

Хьау, IукIыжьыпэнышъ, зыгорэм рекIокIынэу арэп. Нахь зыIуигъэпытахьыгъэри дыхэт. КIо, иIэнатIэ нэмыкI цIэкIэ теджэхэзэ тшIыщт. ГущыIэм пае, нахьыпэм «лIышъхьэ» тIощтыгъэмэ, джы «шъхьэ» закъор дгъэфедэн фаеу къекIы. Мары ащыкIэ ежь президентым ипресс-къулыкъу къытхырэр: Сессием (Госсовет-Хасэу, тыгъуасэ, мэлылъфэгъум и 20-м щыIагъу, ежь президентыр зыхэсыгъэм) еджэгъуитIури зэикIэу хэбзэгъэуцугъэр щаштагъ.