Мы мафэхэм Бразилием щыкIорэ Олимпиадэм апэрэ дышъэ медалыр къыщызыхьыгъэ дзюдоистэу Мудрэнэ Бислъан радиостанциеу «КъэзыIорэр Мыекъуапэ» зыфиIорэм иIофышIэ зэдэгущыIэгъу зыдешIым, Адыгеим зэкIэ щыпсэухэрэм зэрафэразэр къыIуагъ. Адыгэ къэралыгъо университетым физическэ культурэмрэ дзюдомрэкIэ и Институт сызэрэчIэсыгъэм сэ бэ къыситыгъэр, илъэсиплIэ республикэм зыщызгъэсагъ. ОлимпиадэмкIэ зэрэ Адыгееу къызэрэсфэгумэкIыгъэр сэшIэ.

2015-2016-рэ илъэс зэнэкъокъум Урысыем футболымкIэ идышъэ медальхэр къыдэзыхыгъэ ЦСКА-м Натхъо Бибрас щешIэ. Зэхэщэн Iофыгъохэм нахь афэгъэзагъэми, къэлапчъэм Iэгуаор дидзэу бэрэ къыхэкIы. Израиль иадыгэ къуаджэу Кфар-Камэ Натхъор къыщыхъугъ. ЦСКА-м дэгъоу зэрэщешIэрэм дакIоу, Израиль ихэшыпыкIыгъэ командэ изэIукIэгъухэм ахэлажьэ. Илъэси 6 хъугъэу Бибарс Урысыем щэпсэу. Адыгабзэр, урысыбзэр, джуртыбзэр, нэмыкIхэри ешIэх.

АхъщакIэу Урысыем и Банк гупчэу къыдигъэкIыщтхэм Адыгеир къызэрашIэжьырэ чIыпIэхэм ясурэтхэр атырагъэуцо ашIоигъу, фэдэ къэбар къеты Адыгеим и Радио. Ащ къызэри1орэмк1э, сомэ 200 ыкIи сомэ 2000 зэрыт ахъщэхэм атырагъэуцощт тамыгъэхэм якъыхэхынкIэ зэнэкъокъу Банк шъхьаIэм зэхищагъ. Зэнэкъокъум Адыгеим щыпсэухэрэри хэлэжьэнхэ алъэкIыщт. Ащ пае сайтэу «Твоя Россия.РФ» зыфиIорэм ихьэхэмэ хэяшIошI къыщыраIотыкIын амал агъотыщт.

КикбоксингымкIэ Хы ШIуцIэм и Кубок икъыдэхынкIэ хэгъэгу зэнэкъокъухэр Анапэ пэмычыжьэ псэупIэу ШIукъо щыкIуагъэх. Адыгэ Республикэм икIэлэцIыкIу спортеджапIэм зыщызгъасэхэрэм ащ зыкъыщагъэлъэгъуагъ ыкIи яонтэгъугъэкIэ зыхахьэрэ купхэм текIоныгъэхэр къащыдахыгъэх. Нэбгыритфымэ дышъэ медальхэр къафагъэшъошагъ, нэбгырищмэ джэрз медальхэр къыдахыгъэх. Мы спортсменхэр зыгъасэрэр Адыгеим изаслуженнэ тренерэу Сихъу Казбек ары.

2015-рэ илъэсым, чъэпыогъум и 1-м Адыгэ Республикэм и Лъэпкъ музей ыныбжь илъэс 90-рэ хъугъэ. Адыгэ автоном хэкум игъэIорышIапIэ зыдэщыIэгъэ Краснодар ар къыщызэIуахыгъагъ. Ащ апэ чIалъхьэгъагъэхэу тифондхэм лъапсэ афэхъугъэхэр а къалэм дэсыгъэ адыгэхэм зэхащэгъэгъэ шIушIэ обществэм къыугъоигъэ ижъырэ лъэпкъ пкъыгъохэр арых. Чанэу а Iофым пылъыгъэ Наурзэ Ибрахьимэ директор фашIыгъагъ. Апэрэ экспонатыгъэр нэтхъуаемэ ябыракъ.

МацIэр Адыгеим игубгъохэм ишъофхэм ащагъэунэфыгъ. Ащ елъытыгъэу Урысые мэкъумэщ гупчэм икъутамэу Адыгэ Республикэм щыIэм иIофышIэхэм губгъохэр къакIухьэх, Iофым изытет игъэкIотыгъэу зыщагъэгъуазэ. Мыекъопэ районым ащ фэдэ уплъэкIун мы мафэхэм щызэхащагъ. Адыгеим игъунэгъу Ставрополь къуапэм ыкIи Астрахань хэкум мацIэр къарыкощыкIыгъэу агъэунэфыгъ. МацIэр гектар мин 12-мэ ащыхъушIагъ, зы мафэм къыкIоцI км 200-кIэ мэбыбых.

ШIэныгъэлэжьхэм зэрагъэунэфыгъэмкIэ, ныбжьышхорэ лъэпсэшIурэ зиIэ лъэпкъхэу дунаим тетхэм адыгэхэр ащыщых. Тятэжъ пIашъэмэ тхыгъэхэр къытфамыгъэнагъэхэми, нэмыкI хэгъэгухэм къарыкIыгъэхэу лъэхъан зэфэшъхьафхэм тичIыналъэ къихьэгъагъэмэ тилъэпкъ фэгъэхьыгъэу къатхыжьыгъэхэм титарихъкIэ тагъэгъуазэ. Анахь гъэшIэгъонхэм ащыщых урым тарихълэжьэу Геродот къытхыжьыгъэхэр. Ащ икъэбархэм скифхэм афэгъэхьыгъэу бэ ахэтыр.

Сирием икъалэу Аллепо ыкIи ащ иIэгъо-благъохэм афэгъэзэгъэ «Адыгэ Хасэм» «Фэйсбук» хъытыу нэкIубгъом къыфэджэныгъэ къырагъэхьагъ. Ащ зэритымкIэ, Адыгэ пстэуми къяджэх Алеппо дэс адыгэхэм псынкIэу къадэIэпыIэнхэу. Къэбар лъыгъэIэс амал зырызхэм, гущыыIэм пае «ТIуапсэ Прессым» къызэратрэмкIэ, мэфэ заулэ хъугъэу Урысыем ыкIи Сирием ядзэ къухьлъатэхэр Алеппо топкIэ дэох ыкIи Башар Асадым игъусэ дзэхэр къалэм дэхьанхэу загъэхьазырыхэу ары.

Адыгэ ныпэм имафэ мэлылъфэгъум и 25-м дунаем тет Адыгэ пстэуми хагъэунэфык1ы. А мыфэр Адыгэ Республикэм мыщ фэдэу къырагъэкIокIыщт: Сыхьатыр 16.00-м Мыекъуапэ паркым цIыфхэр къыщызэрэугъоищтых. Сыхьатэр 17.00 ахэр лъэсэу къежьэнхи филармонием нэс къэкIощтых. Джащ фэдэу щым тесхэр сыхьатыр 16.00-м Черемушкэ хатэм щыIэ къохьлъатэ саугъэтым дэжь къыщызэрэугъоищтых. Сыхьатыр 17.00 ахэр щыхэм атесхэу филармонием нэс къэкIощтых.

Адыгэ быракъым имафэ апэу 2010-рэ илъэсым хагъэунэфыкIыгъ. А лъэхъаным Хьэпэе Арамбый зыщитхьэмэтагъэ Адыгэ Хасэм и совет сэри сызэрэхэтыгъэм непэ сегъэгушIо. Ащ къыкIэлIыкIорэ илъэси 4-м Адыгэ быракъым имафэ адыгэу дунаем тет пстэуми аштагъ. Сызыхэт купэу Адыгэ Хэкупсэхэр зыфиIорэми лъэпкъ быракъым имафэ Тыркум ыкIи пэмыкI къэралыгъохэм щыхагъэунэфыкIыным ишъыпкъэу дэлэжьагъ. 2014-рэ илъэсым Адыгеим апэрэу быракъыр щагъэмэфэкIыгъ.