Мыгъэрэ илъэсыкIэ гъэмэфэкIыным кIэу къыхэхьэгъагъэр: нэпэ тызыхэтыр XXI-рэ лIэшIэгъу, а лIэшIэгъумкIэ мы кIорэ илъэсыр и 21-рэ, адыгэ илъэсыкIэр зэхэдгъэунэфыкIырэр и 21-рэ мафэр ары, арышъ и 21-рэ сыхьатым и 21-рэ такъикъым угу гухэлъэу иуубытэрэр къыбдэхъущт, – аIуи телефонхэмкIэ зэраIожьыгъ, Iанэхэри унагъомэ ашIыгъэх.
Ащ фэдэ гухэлъхэр цIыфымэ къадигъэхъунэу – жэкIэ къэIуагъэха, къэмыIуагъэха – зиамалыр Тхьэр арышъ, тэри типсэлъэ-лъэIу а Закъом фэдгъэзэн!
Тхьэр адыгэхэм адрэ бзэхэр зыIулъ лъэпкъымэ афэмыдэу нахь къафыщытэу гуцафэ пшIын олъэкIы. ГущыIэм пае, джа тиадыгэбзэ дэдэр зытштэкIэ, бжъэдыгъу-шапсыгъэ диалектхэм мэкъэ пчъагъэу ахэтхэм апшъэ кIоу сыд фэдэбз зигугъу къэтшIын тлъэкIыщтыр? Ари ижъырэ шъыпкъэм къыщежьагъэу? ЩыIэп ащ фэдэ. Адэ сыдэущтэу къытIэкIэхьанэу хъугъа ахэр, Тхьэм къытимыпэсыгъэмэ?
Сино-кавказ бзэ унагъоу илъэс мин 14-кIэ узэкIэIэбэжьмэ щыIагъэм ибзэ ибайныгъэ щыщхэр нахь къызэтезгъэнагъэхэу шIэныгъэлэжьхэм алъытэхэрэр адыгэ-убых-абхазыбзэхэр ары. Джабзэхэр зэу зыIулъыгъэ цIыфлъэпкъыр апэрэ мэкъумэщышIэ хъугъагъ, фышъхьэ лэжьыгъэхэр, пчышъхьэмышъхьэхэр, хэтэрыкIхэр, былым лъэпкъыхэу цIыфым ыIэ илъы хъунэу гъэпсыгъагъэхэм селекцие амалхэр арихьылIэгъагъ, нэмыкI шIыкIэхэр зыфигъэфедэн ылъэкIынэу ышIыгъагъ. А зэпстэур Тхьэр ащ къомытэу зэпигъэфэн ылъэкIыщтыгъэп.
А псэукIэр зэрэдунаеу – мэкъмэщышIэныр, былымхъуныр, нэмыкI шIыкIэхэр – ахэм зынамыгъэсыгъэ чIыпIэ къагъэнагъэп. Тхьэ шIошIыхъуныгъэу ахэлъыгъэри, хабзэу ащ елъытыгъэу къахэтэджагъэри тэдыкIи лъагъэIэсыгъагъ. А псэукIэм щыщщтын гъэтхапэм (мартым) и 21-м игъэмэфэкIыныри. Арышъ, адыгэ Iофым уфэлажьэмэ, Тхьэр къыотэщт непи, Тхьэр къыуатэмэ (талант къыпхилъхьэмэ), пфызэпымыгъэфэн щыIэп.
Мыдрэ 21-рэр пчъагъэрэ мыгъэ зэрэзэтефагъэми зы гупшысэ куу горэ хэмылъыми, бэм тырегъэгупшысэ, тыгу къегъэкIыжьы Тхьэм тызэрэпэмычыжьэ дэдэ цIыф лъэпкъэу тызэрэгъэпсыгъэр…
Арышъ, Тхьам илъэскIэ мафэ шъутырэгъахь!
Natpress